Oi Otu de Martzu, sa Dí Internatzionali de is Deretus de is féminas, mancai siat sulendi unu bentu fridu chi giai giai si fait tremi, seus in Gúspini, in sa Pratzita 8 Martzu, poita ca incíngiant sa panchita a colori tanau dedicada a is féminas chi sunfrint de fibromialgia.
Sa manifestatzioni dd’at cuncordada s’Assótziu Il mercatino dei Sogni a.p.s – Mondo Endo Apre Casa, cun s’agiudu de s’Amministratzioni Comunali. Sa Presidenti de s’Assótziu, Giovanna Maria Tommasi, at bófiu donai cunsideru a sa fibromialgia e dinnidadi a is féminas chi ndi sunfrint, po ddis arregordai ca no funt a solas, ma podint agatai cunfortu psicológicu impari a is àteras. S’Assótziu, chi si interessat fintzas de un’àtera maladia, est a narri s’endometriosi, est giai noi annus chi at aprontau fintzas unu grupu de ascurtu, e totus is chi ndi fai parti circant de donai una manu de agiudu. Custa panchita duncas est pentzada po èssiri unu logu símbolu po s’arregordai ca in is momentus de dolori, ddoi at sèmpiri calincunu prontu a donai unu fueddu de ispera.
A nosu, a èssiri innoi, s’at cumbidau Giovanna Maria, amiga de mamma nosta. Una pariga de diis fait s’at tzerriau in su telèfunu e, sigumenti at iscípiu ca si praxit a iscriri, s’at pediu unu pentzamentu nostu asuba de sa fibromialgia po celebrai custa dí ispetziali. A primmu achitu fiaus unu pagheddu dudosus: custas diis passadas eus tentu unu muntoni de barrancus in su trabballu, e in prus no fiaus segurus de nci arrennesci, a fai una cosa diaici. Perou issa, ca tenit una boxi tanti allirga cantu mannus funt su coru e sa bonesa cosa sua, s’at contau de s’agiudu chi donant impari a is chi funt in s’Assótziu a chi iscoberrit de tenni custu mali malu, e s’at fatu emotzionai meda. E duncas, giai giai no eus acurtu de serrai su telèfunu ca luegus si seus postus a circai de cumprendi mellus, ligendi unus cantu artículus e testimonias agatadas in sa retza, totu sa suferéntzia chi custa maladia causat. Si seus postus a iscriri, e is fueddus funt bessius a solus.
Acabbau de fai, eus imbiau su chi eus iscritu a Giovanna Maria e a issa ddi est pràxiu meda, tanti ca no at pérdiu tempus e at cumandau luegus a Carla, s’amiga sua, a ddu fai imprentai in una pergamena, chi difatis est cussa chi oi arregallant a totus is chi benint a s’incingiadura. Un’arrogu de sa fràsia ddu depinti iscriri fintzas in sa panchita: si poneus s’imàgini digitali, aici dda podeis ligi bosàterus puru.
Po nosu, a s’ai cumbidau a partetzipai, est un’esperiéntzia de importu mannu. S’àtera dí eus agiudau nosu puru a pintai sa panchita de colori tanau, impari a Giovanna, Amalia, Rita e Paola, e oi est un’emotzioni forti diaderus, a èssiri innoi a dda incingiai totus impari.
A metadì de a mangianu lompint is de s’Amministratzioni Comunali, e sa tzerimónia cumentzat. Pustis chi fueddant Giovanna Maria, cun sa boxi sua allirga e praxili, e Alberto Lisci chi rapresentat s’Amministratzioni Comunali, totus is féminas presentis pigant su frochitu chi imboddiat sa panchita e ddu istrobeddant, allairghendiddu: custu gestu est símbulu de un’imprassu a totu is féminas, cumenti ispricat Giovanna Maria. Est unu momentu bellu diaderus.
Una cosa chi si praxit a si contai est ca oi s’at fatu prexei meda a connosci a Monia, una picioca chi sunfrit de fibromialgia. Si narat chi oi no s’intendit beni meda, e custu tempus malu impeurat is doloris. Si contat ca dónnia dí s’agatat a fai is contus cun custu mali e cun doloris sèmpiri diferentis, perou no acabbat mai de isperai in su benidori, chi agantit una cura chi agiudit totus is chi cument’e issa sunfrint a solas e in siléntziu.
Si ndi andaus totus prima de s’ora de prandi, poita su tempus est impeurendi ancora e immoi est tropu frius po abarrai in foras. Isperendi chi custu siat su primu passu po donai prus cunsideru e atenzioni a custa maladia, saludaus totus, cun s’ispera de si torrai a biri luegus, mancai siaus unu pagu dispràxius ca nexi de su tempus is artigianus no ant pótziu fai s’ammosta de is oberas insoru.
Torraus gràtzias a s’amiga nosta Cíntzia e a is cullegas suas de sa Stanhome chi a indonu ant postu sa crema po is manus a totus is chi funt benias, e a s’Assótziu Mondo Endo Apre Casa chi at regalau sa pergamena e is mimosas a totus.
Un’imprassu mannu, e a s’annu chi benit!
