Cenàbara a noti. Esseus de domu ca funt is otu, cun su soli chi nci est calau giai de una pariga de oras. Fatuvatu tzíviat, e difatis si tocat a aberri su paràcua. Is biixeddas de bidda funt iscuras, genti in giru ndi ddoi at pagu e nudda, passat càncua màchina isceti: est ora de cenai, e funt arrefurendi totus a domu.
Nosu duus, imbecis, seus andendi a su Mulinu Garau, ca a is noi oras e mesu faint un’ispetàculu chi, seus giai segurus, s’at a praxi meda diaderus: est cussu chi at cuncordau Su Dotori Micheli Atzori, Amigu, Artista, Cantanti, Atori, e un’iaxi de àteras cosas, e tenit a títulu Lampus! Tronus! Raju! Camminaus a lestru, ca no bieus s’ora de ddu biri.
In pagu tempus aprobiaus a su locali, e ddoi funt Alessandro e Denise chi si arricint prexaus: funt issus, cun s’impresa insoru, sa Agrobass Sardinian Farm (a sighiri is cuntatus in sa retza: situ – instagram – facebook), chi ant pigau in gestioni custu fràigu de importu istóricu mannu. S’úrtima borta chi seus istétius innoi, fiat po Monumenti Aperti 2016, duncas funt passaus unus cantu annus; de cumenti imbucaus, si ndi acataus luegus de su logu, chi ddu ant torrai a ponni a postu e ddu ant fatu totu bellixeddu, cun iscafalis e parastàgius totu a ingíriu acotzaus a is murus, aundi ddoi at unu muntoni de prodúsius in cunfetzionis elegantis de cosa de papai e de bufai chi faint issus etotu, e is machinàrius de s’época (s’edifítziu ddu ant fraigau in sa primmu metadi de su 1900) chi parint nous nous, tanti funt beni tentus e pullius. In mesu de s’aposentu, unas cantu mesixeddas e cadiras aprontadas po is chi ant a benni a biri s’ispetàculu.
E in fundu, a manca, labai a chi ddoi est: Su Dotori in personi, Micheli! Cumenti si biit, si torrat a connosci luegus (cun totu chi seus un’annu chi no si bieus in preséntzia, de cudda dí a su Prémiu Otieri), e nosu curreus lestrus a ddu imprassai. Ita cosa bella, su de si podi torrai a biri pustis de totu custu tempus: seus tropu prexaus!
Ddu castiaus beni, de conca a peis: est in grandu forma, e si biit a is ogus, chi tenit gana de si ponni a contai e a cantai, ma ammancat ancora un’ora e prus a su cumentzu de s’ispetàculu, e intzandus si setzeus totus impari a si fai una ciaciarrada. Impari a issu ddoi est Màuru Mou, su regista, unu piciocu chi fait un’iaxi de cosas (po narri, trabballat cun is de Cada Die Teatru in Casteddu), chi si contat de unu bellu progetu de labboratórius chi est faendi impari a una truma de piciocheddus.
In custa ora chi nci passaus sétzius a mesa, chistionaus de unus cantu argumentus: de música, certu (Micheli si contat ca at iscobertu de pagu is System of A Down, una band chi nosu ascurtaus meda candu seus in màchina – mancu a ddu narri, faendi a bortas a bortas cun Raju!, su discu cosa sua, ca immoi giai giai si ddu ammentaus a memória), ma fintzas de líbburus (s’annu passau, cumenti eus giai contau in custas pàginas, issu si iat donau pràngiu arregalendisí su suu, Giornata avara, e custa borta est tocau a nosu a torrai cena cun su nostu Unu pipiu malu e àterus contus), de progetus de su benidori, de programmas in língua sarda, de política e de unu muntoni de àteras cosas.
Su tempus, a fueddai de totu custas cosas, si nci bolat e, chene si ndi acatai, funt is noi oras e mesu. Est ora… de cumentzai: Micheli si ndi istrantaxat de sa cadira, e pigat su micrófunu in manus. A dolu mannu no podeus narri chi s’aposentu siat prenu de genti a cúcuru – ma si isciit: ondí genti meda parit ca ddu timit, a andai a biri eventus culturalis – ma is chi ddoi funt, seus totus prontus a origas paradas. Màuru est sétziu acanta de nosu, e atacat a arregistrai cun su telefoneddu, e Su Dotori est ingunis, ananti nostu, cun is càscias acústicas a palas chi partint a sonai is nodas de su discu essiu pagus mesis innanti. Su chi est cumentzendi est un’ispetàculu de un’ómini a solu (su chi in ingresu si narat one man show), e duncas fait totu issu: cun s’elaboradori postu ingunis acanta fait partiri is basis musicalis, e si ponit a cantai e a fai rimas. E a ddu biri in sa dimensioni live, a Su Dotori, est togu diaderus: un’esperiéntzia única e istravanada. E pruscatotu si cumprendit luegus cumenti siat su naturali cosa sua, a istentai sa genti cun grandu abbilesa artística.
Candu est a palas de su micrófunu, Dr. Drer giai giai parit un’àteru: de s’ómini tranchillu chi est candu nci chistionas, si mudat a su chi si narat, in gergu, un’animali de palcoscénicu perfetu. Si movit, baddat, cantat, improvvisat e po nosu, e is àterus de su púbbricu, est fàtzili a si ponni totus impari a cantai sighendiddu, acumpangendiddu in is torradas de is cantzonis cun sa boxi (est bellu ca totus ddas imparant luegus), e faendi su tzacamanu in is istrofas.
Po dónnia cantzoni de su discu Raju!, issu fait un’istérria, a bortas contendisí cumenti ddi est acucau de dda iscriri (Cantzoni, Police Partout Justice Null Part), o de s’acuntéssiu istóricu chi ddu at ispirau (Giomaria, Ferrobia), e no ammancant is acadessimentus prus recentis chi pertocant personis sardas ogetu de prepoténtzias de dónnia genia (Ovídiu, Tzia Maria), e fortzis funt própiu custas is chi tocant de prus su coru, su de nosu chi seus ascurtendi e su de Micheli chi est cantendi e contendi. Ma donniuna tenit unu sinnificu fungudu, e chi at giai ascurtau su discu intreu gei ddu cumprendit, de ita seus fueddendi; e a chi ancora no ddu at fatu, si cumbidaus a ddu fai luegus, ca Raju! ddu agatais fintzas in totu is prataformas digitalis.
In mesu de is cosas prus sérias, ddoi at logu fintzas po calincuna unu pagu brullana, si podeus narri aici, cun Micheli chi, in prus de èssiri bonu a fai totu su chi fait, aciungit botadas e críticas a su sistema políticu e mediàticu sardu e natzionali. E s’asseguraus chi no est cosa difítzili a si pentzai chi issu iat a podi èssiri bravu fintzas a fai su stand-up comedian, ca sa fantasia e sa bena satírica chi pertocant custus argomentus certu no ddi pecant.
S’ispetàculu, a dolu mannu po nosu chi iaus a abarrai oras, ascurtendiddu, acabbat: s’úrtima cantzoni de su discu, sa chi tenit su matessi títulu Raju!, dda fait unu pagu diversa de sa versioni in istúdiu. Una cosa ispantosa diaderus, po nosu chi fatuvatu dda poneus a totu pompa in màchina; perou no si iscoviaus nudda, aici si dda eis a gosai bosàterus puru, candu eis a andai a ddu biri.
E, a sa fini, est ora… fintzas de si ndi andai: istudau su micrófunu, su mixer e is càscias, a dolu mannu tocat a si saludai. Abetaus chi acabbit de iscriri s’autógrafu in is líbburus e is discus chi ddi pedint (nosu ddus teneus giai ambaduus), e podeus torrai a s’acurtziai a ddu imprassai a forti. S’ispera est cussa de si podi torrai a biri luegus, sigumenti s’at narau ca bolit s’esclusiva po impitai su contu Àcua trulla, su chi eus presentau a su Cuncursu de Otieri de ocannu, po ndi fai una cantzoni, e nosu si dda donaus cun prexeri mannu – e nci iat a mancai àteru: est un’onori diaderus! – ca seus giai segurus de su bellu arresurtau chi ndi at a essiri, e giai de immoi no bieus s’ora de dda intendi.
E duncas, torraus gràtzias a Micheli, e fintzas a Màuru, po custu bellu ispetàculu chi ant iscípiu cuncordai: un’ora e mesu, de prus puru, de ispàssiu mannu, de música bella, de fueddus e arrexonus fungudus, e de chistionis chi totus iant a depi connosci mellus, ca funt de importu mannu e pertocant sa vida e su benidori de totu is Sardus e de sa Sardigna. E a bosàterus chi ligeis si cuntzillaus, chi si incapitat, de lassai a una parti totu su chi teneis de fai e de andai a ddu biri: Lampus! Tronus! Raju! ddu funt presentendi in dónnia logu e, si boleis isciri is datas noas, bastat a sighiri sa pàgina de sa truma de is Cuncertus de sa CRC Posse o su profilu personali cosa sua.
Ita abarrat de narri? Àteras bortas, Micheli, e àterus discus… e àterus ispetàculus bellus che custu! A luegus!
